2025 жылғы 6 қаңтар, Алматы қаласы. – Жаппай жол апатына ұшыраған жүргізушілер өздеріне тиесілі сақтандыру төлемдерін ерікті сақтандыру (КАСКО) немесе міндетті автосақтандыру (ОГПО ВТС) шеңберінде ала алады. Бүгінгі күні «Еуразия» сақтандыру компаниясының мәліметінше, КАСКО бағдарламасы бойынша төлем алуға үш көлік иесі жүгінген.
КАСКО ерікті сақтандыруы бойынша төлемдер:
КАСКО бағдарламасы аясында зардап шеккен көлік иесі өзінің кінәлі не кінәсіз екеніне қарамастан, сақтандыру төлемін ала алады. Тіпті апатқа кінәлі тарап анықталмаса да, КАСКО полисі төлемді қамтамасыз етеді.
Міндетті автосақтандыру бойынша төлемдер:
Міндетті автосақтандыру (ОГПО ВТС) шеңберінде апатқа кінәлі тараптың сақтандыру компаниясы зардап шеккендерге заңда белгіленген 2000 АЕК немесе 7,864 миллион теңге шегінде өтемақы төлеуге міндетті. Бұл сома зардап шеккендердің санына қарай бөлінеді және барлық шығынды өтемеуі мүмкін. Қалған соманы зардап шеккендер кінәлі тараптан сот арқылы талап ете алады. Алайда, кінәлі тараптың жеке тұлға екендігін және зардап шеккендердің саны мен талап етілетін соманы ескерсек, толық көлемде төлем өндіріп алу ықтималдығы өте төмен.
Кінәлі тарапты анықтау және қосымша шығындар:
Полиция оқиғаның барлық мән-жайын және апатқа кінәлі жүргізушілерді анықтауы тиіс. Егер кінәлі тарап анықталмаса, КАСКО полисі жоқ жүргізушілер көліктерін өз қаражаттарына жөндеуге мәжбүр болады.
Жол сапасына жауапты ұйымдардың жауапкершілігі:
Жол қозғалысы туралы заңнамаға сәйкес, жолдардың қауіпсіздігін қамтамасыз етуге жауапты ұйымдар көктайғаққа қарсы шараларды жүзеге асыруы тиіс. Егер бұл міндеттердің орындалмағаны анықталса және ол апатқа себеп болса, зардап шеккен көлік иелері ұжымдық талап арыз бере алады. Дегенмен, КАСКО арқылы төлем алумен салыстырғанда, сот процестері ұзақ уақыт пен елеулі қаржылық шығындарды қажет етеді.
Статистика:
«Еуразия» сақтандыру компаниясының дерегінше, жол-көлік оқиғаларының 90%-ына екі көліктің қатысуы тән. Ал 10%-ында үш және одан да көп көлік қатысады. Жаппай жол апаты сирек кездесетін оқиға болып саналады.
Еске салайық, 3 қаңтарда Ақмола облысында Астана – Щучинск тас жолында 95 көліктің қатысуымен жаппай жол апаты орын алды. 20 адам медициналық көмекке жүгінді.