Munarmedia.kz 24.11.2025 / Астана / Елордада XXVIII Халықаралық шығармашыл жастар конкурсы «Шабыт» өз мәресіне жетті. Бұл — жас таланттар түрлі өнер бағытында сынға түсетін үлкен мәдени шара, деп хабарлайды қала әкімдігінің баспасөз қызметі.
Биылғы байқауға еліміздің барлық өңірінен, сондай-ақ жақын және алыс шетелден келген 800-ден астам жас өнерпаз қатысты. Жоба елдер арасындағы мәдени байланысты нығайтуға да ықпал етті. Қатысушыларды бағалауға Қытай, Ресей, Түркия, Италия, Қырғызстан және Өзбекстаннан келген мәдениет қайраткерлері мен сарапшылар тартылды.
Байқау бірнеше номинация бойынша қорытындыланды.
«Камерлік хор» номинациясында гран-при Татарстан Республикасының Мемлекеттік камералық хорының еншісіне бұйырды, ал бірінші орынды Ақтөбе облыстық филармониясының Қазақ камералық хоры жеңіп алды. Хор дирижерлері арасында бас жүлде Даурен Мусинге, бірінші орын Ержан Сансызбайға берілді.
Академиялық ән айту және концертмейстерлік өнер бойынша Фируза Рахметова мен Аяжан Шынболат үздік деп танылды. Бірінші орынды Ляйлә Аламанова мен Динара Абдрахманова қанжығалады. «Камерлік музыка» санатында Акбике Алги мен Ілияс Өзбеков жеңімпаз атанды, ал бірінші орын Алия Жақпарова мен Жәния Болатоваға берілді.
Фольклорлық ансамбльдер арасында гран-при «Тарлан» этноансамбліне тапсырылды, бірінші орынды «Түркістан» ансамблі алды. «Эстрадалық вокал» номинациясында Moonaisun триосы бас жүлдеге ие болды, ал бірінші орын MIYA3 триосына бұйырды. Бейнелеу өнері бойынша гран-при берілмегенімен, бірінші орынды Алишер Жүргенов жеңді.
Поэзия номинациясында гран-при иегері — Даурен Тлеухан. Ал бірінші орынды Жеңісұлы Оразай мен Дильда Уәлибекова бөлісті. Креативті бағытта Камза Бөкейхан бас жүлдені иеленсе, Никита Пивторак пен Мәдина Мусина бірінші орынды қанжығалады.
Еске сала кетейік, бұған дейін «Курсив» басылымы Қазақстан Президенті Қасым-Жомарт Тоқаевтың халықаралық Silk Way Star жобасына қатысушыларды құттықтағанын хабарлаған еді. Мемлекет басшысы бұл байқаудың Азия елдерін біріктіретін, гуманитарлық байланыстарды нығайтатын маңызды мәдени алаңға айналғанын атап өткен болатын.