Ата-аналар баласының саусақтарының ұшын кесуге мәжбүр болған дәрігерлерге шабуыл жасады

Көкшетауда үш жасар баланың үйде алған жарақатынан кейін үш саусағының ұшын кесуге тура келген.

Операциядан кейін ата-аналар ауруханада жанжал шығарды, деп хабарлайды «Найза Көкше» порталы.

Ақмола облыстық балалар ауруханасының травматологы Мейрам Дүсекеев баланы қарап, сүйектері үгітіліп кеткендіктен ампутация жасау туралы шешім қабылдаған.

Шұғыл операциядан кейін дәрігер баланы жансақтау бөліміне жіберген. Жансақтау бөліміне бөгде адамдардың кіруіне тыйым салынғанына қарамастан, баланың ата-анасы бөлімге кіріп кеткен.

«Баланы емдеп жатқан палата алдында ата-анасы шу шығарды: дәрігерлерді қорлап, оларға тап берді. Отбасының басшысы медбраттың мойнынан ұстап алған. Мұның бәрі камераға түсірілген, оның ішінде әкенің бөлімнен шығарылған сәті де бар», — деп жазады «Найза Көкше».

Бұл жанжал мұнымен аяқталмады — баланың анасы жансақтау бөлімінен кейін қабылдау бөліміне барып, Дүсекеевке дөрекі түрде шағымдарын айтты.

Ата-аналар да, медицина қызметкерлері де полицияға арызданды. Қазір тексеріс жүргізілуде.

Денсаулық сақтау министрі жедел жәрдем фельдшеріне жасалған шабуылға қатысты соңғы жанжал туралы пікір білдірді: «Медицина қызметкерлеріне қатысты зорлық-зомбылыққа жол берілмейді».

• Фото: Envato Elements.