Munarmedia.kz 05.03.2026 /Астана/ – Астанада Қазақстанның Байтақ жасылдар партиясы мен Жаңару республикалық қоғамдық бірлестігі арасында ынтымақтастық туралы Меморандумға қол қою рәсімі өтті. Бұл құжат экологиялық қауіпсіздік пен мемлекеттік басқарудың тазалығының өзара ажырамас ұғым екенін айқындайды.
Меморандум аясында екі ұйым алғаш рет біртұтас платформада күш біріктіріп, төмендегідей бағыттар бойынша бірлескен жұмыс жүргізуді жоспарлап отыр:
Экология және сыбайлас жемқорлыққа қарсы заңнамалық бастамаларды әзірлеу;
Нормативтік-құқықтық актілерге қоғамдық мониторинг жүргізу;
Сараптамалық топтар құру және халықаралық ұйымдармен өзара іс-қимылды дамыту;
«Таза Қазақстан» ұлттық бастамасына қолдау көрсету.
Қазақстанның «Байтақ» партиясы – соңғы жиырма жылда тіркелген жаңа саяси партиялардың бірі. Партия жасыл экономика қағидаттарын насихаттап, ESG стандарттарын дамыту арқылы экологиялық жауапкершілік мәдениетін қалыптастыруды мақсат етеді.
«Жаңару» республикалық қоғамдық бірлестігі – еліміздегі сыбайлас жемқорлыққа қарсы қозғалыстың жетекші институттарының бірі. Ұйым Сыбайлас жемқорлыққа қарсы іс-қимыл жөніндегі Ұлттық баяндаманы әзірлеуге қатысып, Қазақстан Республикасы ҰҚК жанындағы Қоғамдық кеңесте жұмыс жүргізеді.
Екі ұйым да Қазақстан Республикасы Президенті Әкімшілігі жанындағы Парламенттік реформа жөніндегі Жұмыс тобының құрамына енген. Меморандумда экологиялық жаңғырту мен сыбайлас жемқорлыққа қарсы саясаттың байланысы нақты көрсетіліп, негізгі ұстаным ретінде «жемқорлық – экологияның басты жауы» деп жарияланды.
Сарапшылар бұл құжатты азаматтық қоғам мен саяси институттардың күшін біріктіре отырып, экологиялық қауіпсіздік пен адал мемлекеттік басқару қағидаттарын ілгерілетуге бағытталған маңызды қадам деп бағалайды.
📷 Фото: Астанада Меморандумға қол қою рәсімі / ашық дереккөз.