Сүндетке отырғызу – Қазақстандағы көптеген ұл балалар үшін маңызды медициналық әрі мәдени рәсім. Ата-аналар бұл процедураны қай жерде жасататынын таңдағанда, білікті маман іздеумен қатар, оның құнын да ескереді. Сүндетке отырғызуды мемлекеттік және жеке медициналық мекемелерде жасауға болады. Баға қолданылатын әдіске және қосымша қызметтерге байланысты өзгереді.
Қазіргі таңда бұл процедура дәстүрлі хирургиялық тәсілмен немесе лазер арқылы жасалады. Кейбір клиникалар балаларға ерекше жағдай жасайды: операция кезінде бала ойын приставкасында ойнап немесе мультфильм тамашалай алады.
Баға қалаға байланысты өзгере ме?
Сүндетке отырғызудың құны өңірге қарай әртүрлі. Көбінесе көрсетілген бағаға хирург пен анестезиологтың алдын ала кеңесі, сондай-ақ бөлек тапсырылатын медициналық талдаулар кірмейді.
Тараз, Павлодар және Атырау қалаларында сүндетке отырғызудың ең төменгі бағасы – 10 мың теңге.
Шымкентте бұл процедура 12 мың теңгеден басталады. Сонымен қатар, мұнда медициналық себептерге байланысты ересек ер адамдарға да сүндетке отырғызу жасалады, олардың құны 30-50 мың теңге аралығында.
Көкшетау, Ақтау, Қостанай және Талдықорғанда бұл қызметтің орташа бағасы – 15 мың теңге. Ақтөбеде ең төменгі баға – 18 мың теңге, ал 25 мың теңге төлесеңіз, балаңыз операция кезінде Sony PlayStation ойнап отыра алады.
Түркістан, Жезқазған, Семей және Қызылорда қалаларында сүндетке отырғызудың құны 20 мың теңгеден басталады. Түркістан облысындағы кейбір ауылдық елді мекендерде бұл процедура тегін жасалады, тек символикалық алғыс айту жеткілікті. Ал Қызылордада сүндетке отырғызу тек жеке клиникаларда жасалады, өйткені облыстық балалар ауруханасында мұндай қызмет жоқ.
Өскемен мен Астанада ең төменгі баға – 25 мың теңге. Астанада баланың жайлылығы мен қосымша ойын-сауық қызметтері үшін 10-15 мың теңге артық төлеуге тура келеді.
Қарағанды, Орал және Алматы қалаларында сүндетке отырғызу 30 мың теңгеден басталады. Алматыда жеке клиникалар көп болғандықтан, премиум-клиникаларда бұл процедураның бағасы 100 мың теңгеге дейін жетуі мүмкін.
Ең қымбат қызметтер
Сүндетке отырғызудың ең қымбат бағасы Петропавлда тіркелген. Мұнда процедура құны 35 мың теңгеден басталады.
Көптеген клиникаларда сүндетке отырғызу алдында хирург пен анестезиологтың кеңесінен өту, сондай-ақ қажетті медициналық талдаулар тапсыру міндетті. Бұл қызметтер бөлек төленетіндіктен, жалпы шығын айтарлықтай артуы мүмкін.