Munarmedia.kz.29.09.2026.ASTANA
Қазақстан өңірлерінде қысқы және көктемгі кезеңге көкөніс қорын алдын ала қалыптастыру қажет. Премьер-министр Олжас Бектенов әкімдіктерге маусымаралық кезеңде әлеуметтік маңызы бар көкөністердің тапшылығына және бағаның негізсіз өсуіне жол бермеуді тапсырды.
Үкімет басшысының айтуынша, әсіресе картоп қорын жеткілікті көлемде жинақтау маңызды.
Олжас Бектеновтің сөзінше, өнім жинау науқаны кезінде-ақ қажетті көкөніс көлемін алдын ала келісімшартпен бекітіп, сатып алу және қоймаларға уақытылы орналастыру жұмыстарын ұйымдастыру керек.
«Басым бағыттардың бірі – қысқы және көктемгі кезеңге, әсіресе картопқа қажетті көкөніс қорын қалыптастыру. Өнім жинау науқаны кезінде қажетті көлемді уақытылы келісімшартпен бекітіп, сатып алып, сақтауға қою маңызды», – деді Премьер-министр.
Үкімет басшысы бұл мәселені өңір әкімдерінің жеке бақылауына алуды тапсырды.
Сонымен қатар маусымаралық кезеңде әлеуметтік маңызы бар көкөніс өнімдерінің тапшылығына жол бермеу және олардың бағасының негізсіз өсуіне тосқауыл қою қажеттігін атап өтті.
Артық өнім экспортқа бағытталады
Премьер-министр ішкі нарықтағы қажеттілік толық қамтамасыз етілгеннен кейін қалыптасатын артық өнімді экспортқа бағыттауды ұсынды.
Осыған байланысты Сауда және көлік министрліктеріне ауыл шаруашылығы өндірушілеріне өнім өткізетін нарықтарды табуға және экспорттық бағыттарды ұйымдастыруға көмектесу тапсырылды.
Мұндай шаралар бір жағынан қыс пен көктемде ішкі нарықты көкөніспен тұрақты қамтамасыз етуге, екінші жағынан отандық шаруалардың өнімін өткізу мүмкіндігін кеңейтуге бағытталмақ.
Дереккөз: YK-news.kz
#Munarmedia #Қазақстан #Көкөніс #Картоп #Баға #АуылШаруашылығы #АзықТүлікҚауіпсіздігі #ОлжасБектенов #Экспорт