Munarmedia.kz 21.11.2025 /Астана/ Теміртауда жедел жәрдем қызметінің мамандары дабыл қақты. Олар Денсаулық сақтау министрлігіне және қоғамға ашық үндеу жолдап, жұмыс жағдайының адам төзгісіз деңгейге жеткенін мәлімдеді. Фельдшерлердің айтуынша, олар зиянды әрі қауіпті ортада жұмыс істей отырып, айына небәрі шамамен 200 мың теңге алады.
Медиктер еңбек жағдайының жылдар бойы жақсармағанын, жедел жәрдем көліктерінің тозғанын, бригадалардың толық жасақталмай шығатынын, ал бұл тұрғындарға көрсетілетін көмектің сапасына тікелей әсер ететінін алға тартады.
Жедел жәрдем қызметкерлерінің айтуынша, талаптары қарапайым – қауіпсіз жұмыс ортасы, жарамды техника және өз еңбегіне лайық жалақы.
Фельдшердің бірі өз сөзінде жағдайдың шегіне жеткенін былай жеткізді:
«Балық бастан шіриді. Егер басшылық бізге дұрыс жағдай жасамаса – жабдықталған машиналар, толық құраммен шығатын бригадалар, халыққа сапалы қызмет көрсету мүмкіндігі – ертең науқастың орнында біздің кез келген туысымыз болуы мүмкін. Біз сіздерден нақты әрекет күтудеміз. Уәде деңгейінде қалып қоймасын», — деді ол.
Теміртаулық фельдшерлердің ашық үндеуі саланың мұң-зарын қайта күн тәртібіне шығарды. Жедел жәрдем мамандары тәуліктің кез келген уақытында адам өмірі үшін жауапты болғанымен, олардың еңбек шарттары мен әлеуметтік қолдау деңгейі жылдар бойы өзгермей келеді.
Мамандар мұндай жүктемемен сапалы қызмет көрсетудің мүмкін еместігін айтады. Тозған көлік, жетіспейтін кадр, мардымсыз жалақы – мұның бәрі тек Temіртауда ғана емес, республика бойынша ортақ проблема екені көтеріліп жүр.
Медиктердің хатынан кейін жергілікті және орталық билік органдарының қандай шара қабылдайтыны әзірге белгісіз. Қоғам белсенділері бұл үндеуді елемей қою саладағы жағдайды одан әрі ушықтыратынын айтады.
Мәселе тек еңбек жағдайына емес, тікелей халықтың денсаулығы мен қауіпсіздігіне қатысты болғандықтан, медицина қызметкерлерінің даусы биік мінберден естілуі тиіс.
Жағдай бақылауда, оқиғаға қатысты жаңа ақпараттар жарияланған сайын хабардар етеміз.