Munarmedia.kz | 23.06.2026 | ASTANA Ресейдің Ингушетия республикасында досын құтқару үшін өз өмірін қатерге тіккен 8 жастағы Хизир Дербичевтің денесі сегіз күндік іздеу жұмыстарынан кейін табылды.
Қайғылы оқиға 15 маусым күні болған. Алдын ала мәлімет бойынша, Хизир суға батып бара жатқан досын құтқару үшін өзенге секірген. Нәтижесінде құтқармақ болған бала ағаш бұтақтарына жармасып аман қалғанымен, Хизирдің өзі ағысқа кетіп, із-түзсіз жоғалған.
Оқиғадан кейін Ингушетияда ауқымды іздестіру жұмыстары ұйымдастырылды. Құтқарушылармен қатар жүздеген ерікті жұмылдырылып, Солтүстік Кавказ өңірінің тұрғындары да іздеу шараларына белсенді қатысты.
22 маусым күні құтқарушылар Хизир Дербичевтің денесін тапты.
Жергілікті тұрғындар мен әлеуметтік желі қолданушылары жасөспірімнің әрекетін нағыз ерлік пен жанқиярлықтың үлгісі деп бағалап отыр. Өз өмірін қауіпке тігіп, досын құтқаруға ұмтылған баланың оқиғасы көпшіліктің жүрегін тебірентті.
Қазіргі уақытта өңір тұрғындары мен қоғам белсенділері марқұмның отбасына көңіл айтып, Хизирдің батылдығы ешқашан ұмытылмайтынын атап өтуде.
Фото: AI көмегімен жасалған иллюстрация.
#Ингушетия #ХизирДербичев #Ерлік #Құтқару #ҚайғылыОқиға #Балалар #Кавказ #MunarMedia #ASTANA