Munarmedia.kz / 20.06.2025 / Астана-«ЭКСПО» ісі қайтадан қоғам назарын өзіне аударып отыр — бұл жолы дау бұрынғыдан да күштірек өрбуі мүмкін. Бұрынғы «ЭКСПО-2017» ұлттық компаниясының басшысы Талғат Ермегияевтің адвокаттары оның ісі қайта қаралуы тиіс деп санайды және қолдау сұрап тікелей президент Қасым-Жомарт Тоқаевқа жүгінуде.
Бұған дейін Ермегияевтің орынбасары, дәл осы іске байланысты сотталған Мұрат Омаров Ulysmedia.kz-ке берген сұхбатында бұл істің қолдан ұйымдастырылғанын, ал Ермегияевке тағылған айыптардың негізсіз екенін мәлімдеген еді.
⚡️ Адвокаттар президентке үндеу жолдады
Адвокат Анара Құсайынова Facebook парақшасында Мемлекет басшысының «заңдылық пен әділеттілік әдепкіде қамтамасыз етілуі тиіс» деген сөзіне сілтеме жасай отырып, ел Президентіне әлеуметтік желі арқылы мәжбүрлі түрде жүгінуге тура келгенін жазды.
«Себебі біздің өтініштер мен шағымдар Президентке әдетте жетпейді. Ал Президенттің Виртуалды қабылдауы баяғыда-ақ ұмыт қалды.
Сіздің сөздеріңіз бен тапсырмаларыңызды, өкінішке қарай, барлық шенеуніктер орындауға міндетті нұсқаулық ретінде қабылдамайды. Соттар бұрын қалай құқық қорғау органдарына жалтақтаса, сол үрдіс әлі де жалғасып жатыр», — деп жазды Құсайынова.
⚡️ Негізгі куәгер — психикалық диагнозы бар адам
Қорғаушының айтуынша, Ермегияевке қатысты шығарылған үкім заңсыз. 2016 жылғы 9 маусымда шыққан сот шешімі толығымен жалғыз куәгердің сөзіне негізделген. Ал ол адамның психикалық ауытқуы болғанын адвокаттар дәлелдеп отыр.
Анара Құсайынова бұл мәліметті сот-психологиялық-психиатриялық сараптама қорытындысымен растайды. Оның айтуынша, негізгі куәгер жауап беру кезінде Антикоррупциялық қызметтің бақылауындағы «жасырын пәтерде» болған және психологиялық қысымға ұшырауы мүмкін.
Еске сала кетейік, Талғат Ермегияев 2016 жылы Астана қаласы сотының шешімімен 14 жылға бас бостандығынан айырылған болатын. Ол «ЭКСПО-2017» ұлттық компаниясынан ірі көлемде қаржы жымқырды деген айыппен сотталған.