Munarmedia.kz.06.08.2025 ж. /Астана/-Еуропалық Одақ Қытайға қарсы жаңа санкциялық шараларды әзірлеп жатыр. Бұл – Бейжіңнің Ресейдің Украинадағы соғысына жасырын қолдау көрсеткені туралы айыптаулардан кейін қабылданбақ қадам. Politico басылымы Брюссельдегі дипломатиялық дереккөзге сілтеме жасап, Қытайдың Ресейге әскери сипаттағы өнімдерді жеткізіп отырғанын хабарлады.
Жасырын жеткізілім мен санкцияны айналып өту
Reuters агенттігі шілде айында жүргізген зерттеуінде Қытайда өндірілген дрон қозғалтқыштарының Ресейге жасырын жеткізілгенін, бұл үшін делдал фирмалар пайдаланылып, тауарлар «өндірістік тоңазытқыштар» ретінде рәсімделгенін анықтаған. Бұл – халықаралық санкциялық режимді айналып өтудің айқын көрінісі.
Politico тілшісіне пікір білдірген ЕО-ның жоғары лауазымды дипломаты бұл ақпаратты «нақты әрі Қытайдың рөлін күшейтіп отырғанын көрсететін» дерек деп бағалаған. «Егер Қытайдың қолдауы болмаса, бұл соғыс мүлде басқа сипатта болар еді», – деді ол.
Пекин үнсіз, Еуропа әрекетке көшпек
Аталған жеткізілім фактілері бойынша ЕО-ға мүше он бес ел Қытай үкіметіне ресми сауал жолдаған. Алайда Пекин өз қатысын не жоққа шығарды, не түсініктеме беруден мүлде бас тартқан.
Еуроодақ тамыздан кейін Қытайға қарсы санкцияларды ресми түрде енгізуді жоспарлап отыр. Сонымен қатар, ЕО басшылығы Қытаймен стратегиялық диалогты тоқтатуды көздемейтінін ашық мәлімдеді.
Бұған дейінгі санкциялар
Еуроодақтың шілде айында қабылдаған Ресейге қарсы 18-ші санкциялық пакеті аясында Қытаймен байланысты жеті компания мен екі қаржы институты – Suifenhe Rural Commercial Bank пен Heihe Rural Commercial Bank – шектеу тізіміне енген болатын. Ресеймен белсенді сауда байланыс орнатқан бұл құрылымдар санкцияға ілінді.
Қытай билігі бұл шектеулерді негізсіз деп бағалап, өз мүдделері мен құрылымдарының құқықтарын қорғау үшін қарсы шаралар қабылдайтынын ескертті.
ЕО мен Қытай арасындағы қарым-қатынас жаңа сын-қатерге тап болды. Қытайдың Украинадағы соғысқа жанама қолдауы Батыс елдерінің наразылығын тудырып отыр. Ендігі кезеңде Брюссель Бейжіңге экономикалық қысымды күшейтуді көздеп отыр, алайда бұл қадам еуропалық дипломатия мен жаһандық сауда балансына қалай әсер ететіні әзірге белгісіз.