Munarmedia.kz | 08.10.2026
Еуропаның 19 елінде жалған смартфондарды жаппай сатуға қатысты ауқымды қылмыстық іс бойынша 160-қа жуық тінту жүргізілді. Тергеу мәліметінше, қылмыстық топ 2017 жылдан бері интернет-дүкендер арқылы өзін жаңа Samsung смартфондары ретінде көрсетілген 1 миллионға жуық қолдан жасалған құрылғыны сатуы мүмкін.
Германияның WDR, NDR және Süddeutsche Zeitung басылымдарының бірлескен журналистік зерттеуіне сәйкес, күдікті топ өз өнімдерін Amazon және басқа да онлайн сауда платформалары арқылы өткізген. Іс бойынша негізгі операциялар басталмай тұрып-ақ жеті күдікті ұсталған.
Қолданылған бөлшектерден «жаңа» телефон жасаған
Тергеушілердің нұсқасы бойынша, жалған смартфондар бұрын пайдаланылған түпнұсқа бөлшектерден құрастырылған. Құрылғыларға қажетті компоненттер Азия мен араб елдерінен сатып алынған.
Кейін бөлшектер Дубай мен Гонконгтағы арнайы шеберханаларда тазаланып, қайта құрастырылған. Дайын телефондар сыртқы қаптамасы мен орамасы түпнұсқа жаңа смартфоннан айырғысыз болатындай етіп дайындалған.
Қылмыстық схеманың маңызды орталықтарының бірі Германияның Крефельд қаласындағы қойма болған. Тінту кезінде құқық қорғау органдары ол жерден мыңдаған осындай смартфонды тапқан.
Қылмыстық желі €300 млн-нан астам табыс тапқан болуы мүмкін
Тергеу деректеріне қарағанда, 2017 жылдан бері бұл желі жалған смартфондарды сатудан кемінде 300 млн еуро табыс тапқан.
Сонымен қатар Германияның өзінде күдіктілер жалған компаниялар желісін және ойдан шығарылған трансшекаралық жеткізу операцияларын пайдаланып, кемінде 24 млн еуро салық төлеуден жалтаруы мүмкін деген күдік бар.
Қазір Еуропаның 19 еліндегі тергеу амалдары жалғасып жатыр. Құқық қорғау органдары жалған смартфондардың нақты көлемін, қылмыстық желінің барлық қатысушыларын және интернет-платформалар арқылы жасалған сауда операцияларының толық ауқымын анықтап жатыр.
#Munarmedia #MunarmediaKz #Еуропа #Германия #Смартфон #Samsung #Amazon #ЖалғанСмартфон #Алаяқтық #Қылмыс #Тергеу #Технология #ИнтернетСауда #Жаңалық