Munarmedia.kz 03.02.2026 /Astana/ 25 ақпан күні таңертең жергілікті уақыт бойынша Кубаның аумақтық суларында, Вилья-Клара провинциясына қарасты Корралильо муниципалитеті жағалауында күдікті жылдам жүретін катер анықталды. FL7726SH (Флорида, АҚШ) нөмірлік белгісі бар шағын кемені Куба жағалау күзетінің бес қызметкері тоқтатып, тексеруге әрекет жасаған.
Алайда тексеру барысында белгісіз тұлғалар құқық қорғау органдарына оқ жаудырған. Атыс салдарынан топ жетекшісі жарақат алды. Қарсы атыс нәтижесінде белгісіз кемедегі төрт адам оқиға орнында қаза тапты, тағы алтауы жараланды. Жараланғандар ұсталып, оларға медициналық көмек көрсетілді.
Тергеу барысы және анықталған деректер
Қазіргі уақытта шабуыл жасаған он адамның жетеуінің жеке тұлғасы анықталды. Кубаның Ішкі істер министрлігі олардың есімдерін жариялады:
Amijail Sánchez González
Leordan Enrique Cruz Gómez
Conrado Galindo Sariol
José Manuel Rodríguez Castelló
Cristian Ernesto Acosta Guevara
Roberto Azcorra Consuegra
Michel Ortega Casanova (жойылды)
Қаза тапқан тағы үш адамның жеке басын анықтау жұмыстары жалғасуда.
Алдын ала мәліметтерге сәйкес, шабуылға қатысқандар — АҚШ-та тұратын кубалық эмигранттар. Олар Куба аумағында террористік әрекеттер ұйымдастыруды жоспарлаған. Қару-жарақ ретінде шабуыл винтовкалары, «Молотов коктейлін» жасауға арналған материалдар, бронежилеттер, камуфляж киімдері және оптикалық көздеу құралдары тәркіленді.
Тергеу деректеріне сүйенсек, аталғандардың екеуі — Amijail Sánchez González пен Leordan Enrique Cruz Gómez — бұған дейін Куба билігінің іздеу базасында болған. Олар қылмыстық құқықбұзушылықтар мен террористік әрекеттерге қатысы бар деген күдікке ілінген.
Тарихи сабақ және бүгінгі ахуал
Сарапшылардың пікірінше, бұл оқиға XX ғасырдың 60-жылдарындағы жағдайларды еске түсіреді. 1961 жылы Плайя-Хиронға (Шошқа шығанағы) жасалған сәтсіз десанттық операциядан кейін Куба аумағына шағын қарулы топтарды жіберу тәжірибесі жиілеген болатын. Ол кезде Орталық Америкадағы бірқатар режимдер мен АҚШ-тың қолдауына сүйенген күштер Кубадағы ішкі контрреволюциялық қозғалыстарды, әсіресе Эскамбрай таулы аймағындағы қарулы топтарды қолдауға тырысқан.
Алайда мұндай әрекеттердің басым бөлігі ел ішіндегі Қорғаныс комитеттері мен халық милициясының жедел қимылының арқасында дер кезінде әшкереленіп, жолы кесілген еді.
Бүгінгі оқиға да Куба айналасындағы геосаяси шиеленістің толық сейілмегенін аңғартады. Сарапшылардың айтуынша, шағын арал мемлекетіне қысым көрсету саясатының түрлі формалары сақталып отыр.
Куба билігі ел аумағына жасалған кез келген қарулы басып кіру әрекетіне қатаң жауап берілетінін мәлімдеді.
Қазіргі таңда тергеу амалдары жалғасуда. Оқиғаның халықаралық-құқықтық салдары мен оған қатысты ресми Вашингтонның ұстанымы алдағы уақытта белгілі болуы мүмкін.