Енді әкімдіктер азаматтарға митинг өткізуге негізсіз бас тарта алмайды – олар қазақстандықтарға балама орын немесе уақыт ұсынуға міндетті.
Қазақстан Республикасы Конституциялық соты бір азаматтың бейбіт жиналыстар туралы заңның ережелеріне шағымын қарады. Қыркүйек айында ол Астанада митинг ұйымдастыруға рұқсат ала алмаған, бірақ сотқа жүгінуді жөн көрді.
«Бейбіт жиналысқа құқық абсолютті емес. Оны Конституция шеңберінде шектеуге болады. Әрбір бас тарту шешімі нақты жағдайлар мен қауіптерге мұқият талдау жүргізу негізінде қабылдануы тиіс. Іс-шараның мақсаттары, қоғамдық маңыздылығы мен ауқымы ескерілуі қажет», – деп түсіндірді сот.
Соттың айтуынша, мемлекеттік орган балама нұсқа ұсынбаса, жиналыс өткізуге рұқсат беруден бас тартуға болмайды. Ұйымдастырушылар мұндай шешімдерді сот арқылы қайта қарата алады.
Әкімдіктер енді өз сайттарында жиналыс өткізу орындары туралы ақпаратты жариялауға міндетті. Онда нақты күндер, уақыт және іс-шараға қатысушылардың болжамды саны көрсетілуі тиіс.
Айта кетейік, жақында Темірлан Енсебекті қолдаған жалғыз адамдық пикеттері үшін журналистер Руслан Бикетов пен Әсем Жапишева 15 тәулікке қамауға алынған еді.
Контекст: QazNews24 сатиралық арнасының әкімшісі Темірлан Енсебек екі айға қамауға алынған.
* Фото: Envato Elements.
t.me/orda_kz