Қаржы мониторингі агенттігі алты микроқаржы ұйымының (МҚҰ) қызметінде ауқымды заңбұзушылықтарды анықтады. Бұл компаниялар клиенттерін қарыздық тәуелділікке түсіріп, миллиардтаған теңгені артық төлеуге мәжбүрлеген.
АФМ (ҚМА) мәліметінше, Алматыдағы департамент алаяқтық пен заңсыз кәсіпкерлік қызметі бойынша алты МҚҰ басшыларына қатысты тергеу жүргізіп жатыр. Олар:
▪️ Creditum
▪️ Sofi Finance
▪️ Hava Finance
▪️ SF Offline
▪️ POS Credit
▪️ Сәлем Кредит
Қарыз алушыларды қандай схемаға тартқан?
Бұл микроқаржы ұйымдары қарызын төлей алмай жүрген клиенттерді өздерімен байланысы бар компаниялармен кепілдік келісімшарттарына қол қоюға мәжбүрлеген. Бұл келісімдер үш онлайн-платформа арқылы жасалған.
Алайда, кепілдік компания қарызды тек қарыз алушы қайтыс болған жағдайда ғана төлеуге міндеттелген.
"Бұл «қызмет» үшін бастапқы несие сомасынан бірнеше есе көп төлем алынған, соның салдарынан азаматтар қаржылық тұзаққа түсті. Ақырында, қарыз алушылар алған несиелерінен 3-5 есе артық ақша төледі," – деп мәлімдеді агенттік.
Бір борышкердің мысалы
120 мың теңге несиесін төлей алмаған азамат «жалған кепілдік» келісімі бойынша 446 мың теңге төлеуге мәжбүр болған. Бұл сома бастапқы қарыз бен пайыздарды қоспағанда есептелген.
МҚҰ қалай пайда тапты?
Бұл схемалар арқылы алты микроқаржы ұйымы заңсыз табыс тауып, қарыз сомасынан әлдеқайда көп қаражат жинаған. Жалпы шығын көлемі – 30 миллиард теңге.
Наурыз айының басында Қазақстанда коллекторлық агенттіктерге қатысты жаңа талаптар енгізілгені хабарланған еді.