Munarmedia.kz.15.07.2025 ж. /Астана/-Қазақстан Бас прокуратурасы арнайы прокурорлар қызметінің бұрынғы басшысы Олеся Кексельге қатысты Қылмыстық кодекстің 146-бабы 2-бөлігінің 1 және 2-тармақтары (азаптау) бойынша қылмыстық іс қозғағанын растады. Бұл туралы KazTAG агенттігіне прокуратураның баспасөз қызметі хабарлады.
«2025 жылғы 4 шілдеде Кексель Олеся Иосифовна — Сыбайлас жемқорлыққа қарсы іс-қимыл ұлттық бюросы тергеу департаменті басшысының бұрынғы орынбасары — ҚР ҚК 146-бабы 2-бөлігінің 1 және 2-тармақтарымен көзделген қылмысты жасады деген күдікке ілінді. Қазір бұл іс бойынша сотқа дейінгі тергеу жалғасып жатыр, қосымша дәлелдер жинауға бағытталған тергеу әрекеттері жүргізілуде», — деп мәлімдеді ведомство.
Олеся Кексель мен экс-бас прокурор Талғат Татубаев экономикалық және сыбайлас жемқорлық қылмыстармен күрес агенттігін (бұрынғы Қаржы полициясы) басқарған Қайрат Қожамжаровтың ең жақын серіктестері саналған.
Еске сала кетейік, бұған дейін Талғат Татубаев та осы бап бойынша екі айға қамауға алынғаны хабарланған еді. Екеуі де күдікті ретінде тергеліп жатқан "Қожамжаров тобының" мүшелері ретінде аталады. Бұл топқа қылмыстық істерді қолдан жасау, азаптау және өзге де ауыр қылмыстар бойынша қатысы бар деген айыптар тағылуда.
KazTAG сайты аталған тұлғаларға қатысты досьені жариялаған.
📸 Фото: ашық дереккөзден алынған.