Munarmedia.kz | 22.06.2026 | ASTANA Өзбекстанның бірнеше өңірінде құқық қорғау органдары азаматтарды Оңтүстік Кореяға жұмысқа және оқуға орналастыруды уәде етіп, ірі көлемде алаяқтық жасаған тұлғаларды анықтады.
Тергеу мәліметінше, заңсыз әрекеттердің ең ірі фактілерінің бірі Ферғана облысында тіркелген. Қылмыстық іс бойынша облыстық Сыртқы еңбек көші-қоны агенттігі филиалының бұрынғы басшысы күдікті ретінде танылған.
Бұрынғы шенеунік өзінің қызметтік беделін пайдаланып, сегіз азаматтан жалпы сомасы 90 мың АҚШ долларын алған. Ол жәбірленушілерге арнайы емтихандардан өткізіп, кейін Оңтүстік Кореяға жұмысқа жіберуге уәде берген.
Сол өңірде тағы бір делдал көші-қон саласындағы «сенімді байланыстарын» алға тартып, бір азаматтан 10 мың АҚШ долларын иемденген. Кейін ол қаражаттың 3 мың долларын ғана қайтарған.
Наманган облысының Янгикурган ауданында екі адамнан құралған қылмыстық топ 22 тұрғынды алдап, 34,2 мың АҚШ доллары мен 79,3 миллион сумды заңсыз иеленген.
Жызақ облысында құқық қорғау органдары үш бірдей алаяқтық фактісін тіркеді. Бұрын сотталған И.А. есімді азамат алты адамнан 32,3 мың АҚШ долларын алған. Ал Фарыш ауданында тағы бір күдікті 4 мың долларды иемденсе, облыстың тағы бір тұрғыны жеті мың долларды заңсыз алған. Тергеу барысында қаражаттың аз ғана бөлігі қайтарылған.
Алаяқтық әрекеттер Сырдария, Самарқанд және Бұхара облыстарында да анықталды.
Сырдария облысындағы Гүлістан қаласында жергілікті тұрғын алты азаматтан Корея визасы мен еңбек келісімшартын рәсімдеп беремін деген желеумен 19 мың АҚШ долларын жинаған.
Самарқандта бір азамат шетелге шығуға көмектесемін деген уәдемен жәбірленушіден 12,5 мың АҚШ долларын алған.
Ал Бұхара облысының Гиждуван ауданында бұрын сотталған күдікті жоғары билік өкілдерімен жалған байланыстары барын айтып, азаматты Кореядағы жоғары оқу орнына түсіріп, қосымша жұмыс тауып беремін деп 5,6 мың АҚШ долларын иемденген.
Құқық қорғау органдарының мәліметінше, анықталған барлық фактілер бойынша қылмыстық істер қозғалған. Қазіргі уақытта ықтимал сыбайластарды анықтау және жәбірленушілерге келтірілген материалдық шығынды өтеу бағытында тергеу амалдары жүргізілуде.
Сарапшылар азаматтарды шетелде жұмысқа орналастыру немесе оқуға жіберу бойынша қызмет ұсынатын ұйымдардың заңды мәртебесін мұқият тексеруге және тек ресми мекемелер арқылы әрекет етуге шақырады.
#ASTANA #Өзбекстан #ОңтүстікКорея #ЕңбекМиграциясы #Алаяқтық #Ферғана #Наманган #Жызақ #Самарқанд #Бұхара #Munarmedia