Қазақстанның Мәдениет және ақпарат министрлігі АҚШ-тан дезинформациямен күрес бағдарламаларын іске асыру үшін қаржыландыру алғаны туралы ақпаратты ресми түрде теріске шығарды.
Ведомствоның мәліметінше, елде медиасауаттылықты арттыру және медиа саласы өкілдерінің кәсіби біліктілігін дамытуға бағытталған іс-шаралар жүргізілген. Бұл жобалар халықаралық Internews ұйымымен бірлесіп және АҚШ-тың халықаралық даму агенттігінің (USAID) қолдауымен ұйымдастырылған.
Алайда министрлік америкалық тараптан ешқандай тікелей немесе жанама қаржыландыру алмағанын атап өтті. Дезинформацияға қарсы барлық бастамалар тек ұлттық деңгейде және ведомствоның өз қаражаты есебінен жүзеге асырылуда.
«Министрлік ешқандай қаржылай қаражатты тікелей де, жанама да алған жоқ», – деп жауап берді Мәдениет және ақпарат министрлігі ақпарат агенттігінің сауалына.
Сонымен қатар, АҚШ Мемлекеттік департаментінің деректеріне сәйкес, 2024 жылы Қазақстан аумағында USAID қолдауымен 28 түрлі бағдарлама жүзеге асырылған. 2023-2024 жылдар аралығында осы жобаларға бөлінген жалпы қаржы 26,5 миллион долларды құраған.