Украина Жоғарғы Радасында Ресей мен Беларусьтен мұнай мен газ транзитіне және импортына тыйым салу туралы заң жобасы тіркелді. Құжаттың бастамашысы, депутат Сергей Нагорняк, Қазақстан, Әзербайжан, Өзбекстан және басқа да елдерден энергия тасымалдауды жолға қоюды ұсынады.
2025 жылғы 7 қаңтарда №12380 тіркелген заң жобасы соғыс жағдайы кезінде Украина аумағы арқылы Ресей мен Беларусьтен келетін мұнай мен газ құбырларының қозғалысын тоқтатуды көздейді. Бұған дейін ұсынылған заң жобаларынан айырмашылығы, бұл құжат Украинаның халықаралық міндеттемелерін ескереді және мұнайдың шығу тегі расталған жағдайда транзитке рұқсат береді.
Құжаттың негізгі мақсаты:
Ресейдің энергетикалық экспортынан түсетін табысын азайту,
РФ-ға қарсы санкцияларды қолдау,
Украинаның энергетикалық қауіпсіздігін қамтамасыз ету.
Заң жобасы авторларының пікірінше, Ресейдің мұнай және газ экспорты – Кремльдің табыс көзі ғана емес, сонымен қатар саяси қысым жасау құралы.
Бұған дейін осындай шектеулер қызу пікірталас тудырған. 2016 жылы Ресей мен Украина арасында сауда дауы туындап, мәселе Дүниежүзілік сауда ұйымына (ДСҰ) берілген.
Егер заң қабылданса, Қазақстан мұнайын Украина арқылы экспорттау мүмкін бе? Бұл Қазақстан, Ресей және Украина арасындағы келіссөздерге байланысты болады.