Munarmedia.kz 18.03.2026 /Astana/ – Мемлекет басшысы соңғы күндері жасаған мәлімдемелерінде Ислам Республикасындағы қазіргі проблемаларға ел басшылығының саясаты себеп болып отырғанын меңзеді.
Депутаттармен кездесу барысында ол «діни архаикаға және ұлттық мүдделерді қате түсінуге сүйенетін ультраконсервативті саяси жүйелер өміршең емес әрі күйреуге ұшырайды» екенін айтты. Нақты ел аталмағанымен, сарапшылар бұл пікір Иранға қатысты екенін атап өтуде.
Сонымен қатар жаңа Конституцияға байланысты дауыс беру күні Президент Иран туралы сауалға жауап берді. Ол ел президенті Масуд Пезешкианды зайырлы көзқарастағы тұлға ретінде оң бағалағанымен, мемлекетте «қос билік» бар екенін жеткізді.
Президенттің айтуынша, Пезешкианның Иран Парсы шығанағындағы араб елдеріне шабуыл жасамайды деген мәлімдемелері кейін іс жүзінде жоққа шығарылған.
«Бұл Иран президентінің толық билікке ие емес екенін көрсетеді. Бұл – факт», – деді Қасым-Жомарт Тоқаев.
Ол барлық елдерде, соның ішінде Қазақстанда да қос билік болмауы тиіс екенін айтып, Ирандағы жағдайды «көптеген мемлекеттер үшін үлкен сабақ» деп атады.
Мемлекет басшысы Қазақстанда да 2022 жылға дейін белгілі бір деңгейде қос билік болғанын, оның Қаңтар оқиғасына алып келгенін еске салды. Соның нәтижесінде Нұрсұлтан Назарбаев «Елбасы» мәртебесінен айырылған болатын.
28 ақпанда АҚШ пен Израиль Иранға соққы жасады. Жауап ретінде Тегеран Израильге зымыранмен соққы беріп, Таяу Шығыстағы АҚШ әскери базаларына шабуыл ұйымдастырды.
Осыдан кейін Қазақстан Президенті Біріккен Араб Әмірліктері, Сауд Арабиясы, Катар, Бахрейн, Иордания және Кувейт басшыларына жеделхат жолдап, араб елдеріне қарсы әскери әрекеттерді айыптаған.
Кейінірек Иран көрші елдерге олардың аумағынан соққы жасалмаған жағдайда шабуыл жасамайтынын мәлімдеді. Қазақстан басшысы бұл шешімді құптағанымен, артынша Ислам Республикасы соққыларды қайта жалғастырды.