Munarmedia.kz | 22.06.2026 | ASTANA Қазақстанда жанар-жағармай материалдарын көршілес елдерге заңсыз тасымалдауға қарсы бақылау шаралары күшейтілді. Ішкі істер министрлігінің мәліметінше, соңғы екі айда құқық қорғау органдары ел аумағынан заңсыз шығарылмақ болған шамамен 17 тонна жанар-жағармайдың жолын кескен.
Ведомствоның хабарлауынша, құқық бұзушылар көбіне автокөліктерге көлемі заңсыз ұлғайтылған немесе жасырын орнатылған қосымша жанармай бактарын пайдаланады. Тексеру барысында осындай өзгерістер енгізілген 87 көлік анықталып, олардың иелері әкімшілік жауапкершілікке тартылған.
Ең көп заңбұзушылық фактілері Жамбыл облысында тіркелген.
Сондай-ақ полиция қызметкерлері мемлекеттік кірістер органдарымен бірлесіп, қосымша жанармай бактарын орнатумен айналысатын 16 техникалық қызмет көрсету станциясына тексеру жүргізді. Нәтижесінде алты нысан иесіне қатысты әкімшілік материалдар рәсімделді.
Маусым айының басында Қазақстан Ұлттық қауіпсіздік комитеті 2026 жылдың алғашқы бес айындағы жанармай контрабандасына қарсы күрес қорытындыларын жариялаған болатын. Комитет дерегіне сәйкес, жыл басынан бері мемлекеттік шекарада жанармайды заңсыз әкетудің 2400-ден астам әрекетінің жолы кесіліп, 300 тоннадан астам бензин, дизель отыны, керосин және өзге де мұнай өнімдері тәркіленген. Тәркіленген өнімдердің жалпы құны шамамен 60 миллион теңгеге бағаланған.
20 маусым күні ҚР Премьер-министрі Олжас Бектенов мұнай өнімдері нарығындағы жағдайға арналған арнайы кеңес өткізді. Жиынға салалық министрліктер мен құқық қорғау органдарының басшылары қатысты. Үкімет басшысы шекарадағы бақылауды күшейтіп, мұнай өнімдерін заңсыз әкету схемаларының жолын кесу жөнінде тапсырма берді. Бұл шаралар ішкі нарықта жанармай тапшылығының алдын алуға бағытталған.
Сарапшылардың айтуынша, соңғы уақытта көршілес Ресейде жанармай бағасының Қазақстанмен салыстырғанда айтарлықтай жоғары болуы заңсыз экспорт тәуекелін арттыруы мүмкін. Кейбір бақылаушылар мұны шекаралас өңірлерде сұраныстың күрт өсуіне ықпал ететін фактор ретінде бағалап отыр.
Ал Энергетика министрлігі қазақстандық мұнай өңдеу зауыттары қалыпты режимде жұмыс істеп жатқанын мәлімдеді. Ведомствоның мәліметінше, бензин, дизель отыны және авиаотын қоры 1 миллион тоннадан асып, ішкі сұранысты толық қамтамасыз етуге жеткілікті деңгейде сақталған. Ең алдымен жанармай құю станциялары, ауыл шаруашылығы өндірушілері мен әуе тасымалдаушылары қамтамасыз етілуде.
Министрлік республика бойынша жанар-жағармай тапшылығы жоқ екенін атап өтті. Дегенмен сарапшылар солтүстік және шығыс өңірлердегі шекара маңында жанармайға деген сұраныстың шоғырлануы жекелеген аймақтарда уақытша «жергілікті тапшылықтың» туындауына әсер етуі мүмкін екенін жоққа шығармайды.
#ASTANA #Қазақстан #Жанармай #ГСМ #Контрабанда #Шекара #МұнайӨнімдері #ОлжасБектенов #Энергетика #ҰҚК #Munarmedia