Munarmedia.kz.03.08.2025 ж. /Астана/-Қазақстан Ішкі істер министрлігі таратқан ресми ақпаратқа сәйкес, Астана мен Солтүстік Қазақстан облысында адам саудасымен айналысқан екі ұйымдасқан қылмыстық топтың мүшелері ұсталды. Тәртіп сақшыларының мәліметінше, бұл топтар жүйелі түрде интернет арқылы жезөкшелік қызметтерді жарнамалап, күн сайын 1,5 миллион теңгеге дейін табыс тапқан.
2024 жылдың басынан бері қылмыстық топтардың жалпы қаржылық айналымы 1,7 миллиард теңгеден асқан. Тергеу барысында полицейлер қолма-қол ақша, байланыс құралдары, автокөліктер мен цифрлық тасымалдағыштарды тәркіледі. Ұсталғандардың негізгі қатысушылары қамауға алынып, қазіргі уақытта сотқа дейінгі тергеу амалдары жүріп жатыр. Заңға сәйкес, оларға мүлкін тәркілей отырып, 12 жылға дейін бас бостандығынан айыру жазасы қолданылуы мүмкін.
Айта кетейік, бұған дейін, 2024 жылдың наурыз айында Ішкі істер министрлігі елімізде адам саудасы, жезөкшелікке тарту, оның ішінде кәмелетке толмағандарды да осы іске жұмылдыру, притон ұйымдастыру және жеңгетайлық бойынша үш күн ішінде 40 қылмыстық іс тіркелгенін хабарлаған болатын.
Сонымен қатар сол күндері құқық қорғау органдары 156 әкімшілік құқықбұзушылықты – жеңгетайлыққа орын-жай беру фактілері бойынша және тағы 640 құқықбұзушылықты – қоғамдық орындарда тиіскендер бойынша тіркеген.
Munarmedia.kz ақпараттық қызметі