Munarmedia.kz. 26.09.2026. ASTANA.Соңғы бір жарым айда Қазақстанда алаяқтардың Ұлттық банк қызметкері ретінде таныстырып, азаматтарды алдаған 39 фактісі тіркелді. Қылмыскерлер адамдарға «шоттарыңызға шабуыл жасалып жатыр» деп, ақшасын қауіпсіз шотқа аударуға көндірген.
Осындай жағдайлардың бірі Жезқазған қаласында болған. Қаскөйлер ер адамға оның банк шоттарын бұзуға әрекет жасалып жатқанын айтып, ақша қаражатын қорғау қажеттігіне сендірген.
Алаяқтардың сөзіне иланған азамат депозиттеріндегі қаражатын шешіп алып, оны үшінші тұлғалардың шоттарына аударған. Соның салдарынан жәбірленушіге 9 млн теңге көлемінде материалдық шығын келген.
Құқық қорғау органдары мұндай қоңырауларға сақтықпен қарауға шақырады. Мамандардың айтуынша, мемлекеттік органдардың қызметкерлері телефон арқылы азаматтардан ақша аударуды, несие рәсімдеуді немесе мүлкін сатуды талап етпейді.
Сондай-ақ азаматтарға бейтаныс адамдарға SMS арқылы келген кодтарды, парольдерді және банк картасының деректерін бермеу ескертіледі.
Мамандардың айтуынша, алаяқтар көбіне адамды қорқытып немесе асықтырып, оның қалыпты шешім қабылдауына мүмкіндік бермеуге тырысады. Сондықтан күмәнді қоңырау түскен жағдайда әңгімені дереу тоқтатып, банкке немесе тиісті мемлекеттік органға ресми байланыс арналары арқылы өзіңіз хабарласқан жөн.
#Munarmedia #Қазақстан #Алаяқтық #ҰлттықБанк #Жезқазған #Қаржы #Қауіпсіздік #Киберқауіпсіздік #Жаңалық