Munarmedia.kz. 25.09.2026. ASTANA. Қазақстанда түрлі жастағы азаматтар бірқатар ауруды ерте анықтау үшін профилактикалық скринингтен өтеді. 2026 жылдан бастап азаматтарға медициналық тексеруден өту қажеттілігі туралы цифрлық жүйе арқылы хабарлама жіберіледі.
Скринингтің негізгі мақсаты — ауруды алғашқы кезеңінде анықтап, дер кезінде ем қабылдауға мүмкіндік беру.
Қолданыстағы тәртіпке сәйкес, 40–76 жастағы ерлер мен әйелдер екі жылда бір рет артериялық гипертония, жүрек-қан тамырлары аурулары, қант диабеті және глаукоманы анықтауға арналған тексеруден өтеді.
Әйелдерге де бірнеше бағыт бойынша арнайы скрининг қарастырылған.
40–72 жастағы әйелдер екі жылда бір рет сүт безі обырына, ал 30–74 жастағылар төрт жылда бір рет жатыр мойны обырына тексеріледі.
Ал 50–76 жас аралығындағы азаматтарға колоректалды обырды, яғни тоқ ішек пен тік ішек қатерлі ісігін ерте анықтауға арналған скрининг жүргізіледі.
Ауыл тұрғындары да қамтылады
Медициналық тексерулерді шалғай елді мекендердің тұрғындарына қолжетімді ету үшін елімізде 144 мобильді медициналық кешен жұмыс істейді.
Олар медициналық ұйымы жоқ немесе мамандандырылған медициналық көмекке қолжетімділігі шектеулі ауылдарға барып, тұрғындарды тексеруден өткізеді.
Тек биылғы екінші тоқсанда мобильді кешендер арқылы 685 мыңға жуық адам медициналық тексеруден өткен. Оның ішінде шамамен 50 мың тұрғыннан түрлі аурулар анықталған.
Мамандардың айтуынша, профилактикалық тексерулердің маңызы — адамның денсаулығында айқын белгі байқалмай тұрған кезде ауруды анықтауға мүмкіндік беруінде.
Сондықтан азаматтарға цифрлық жүйе арқылы келген скрининг туралы хабарламаны назардан тыс қалдырмай, белгіленген мерзімде емханаға барып тексеруден өту маңызды.
#Munarmedia #Қазақстан #скрининг #денсаулық #медицина #қатерліісік #диабет #глаукома #гипертония #ауыл #медициналықтексеру