16.06.2026. ASTANA. Munarmedia.kz – Қазақстанда интернет кеңістігіндегі әдеп нормаларын сақтау талаптарын күшейту мақсатында онлайн-платформаларда бейәдеп сөздер қолданғаны үшін әкімшілік жауапкершілік енгізу мәселесі қарастырылып жатыр.
Тиісті түзетулер Қазақстан Республикасының Әкімшілік құқық бұзушылық туралы кодексіне енгізілуі мүмкін. Қазіргі уақытта заңнамалық өзгерістер мемлекеттік органдардың қарауында және жақын уақытта Парламент талқылауына ұсынылуы ықтимал.
Қолданыстағы заңнамаға сәйкес, қоғамдық орындарда балағат сөз айту ұсақ бұзақылық ретінде бағаланып, оған айыппұл салу, қоғамдық жұмыстарға тарту немесе әкімшілік қамауға алу жазасы қарастырылған.
Ұсынылып отырған өзгерістер интернеттегі және түрлі онлайн-платформалардағы қарым-қатынас мәдениетін реттеуге бағытталған. Сарапшылардың пікірінше, әлеуметтік желілер мен цифрлық сервистердің кең таралуына байланысты азаматтардың онлайн ортадағы жауапкершілігін арттыру қажеттілігі туындап отыр.
Сонымен қатар елімізде коучтер мен медиаторлардың кәсіби этика стандарттарын жетілдіру жұмыстары жалғасуда. Бұл бастамалар қоғамда өзара сыйластық мәдениетін қалыптастыруға, қоғамдық диалогтың сапасын арттыруға және азаматтар арасындағы коммуникацияны өркениетті деңгейде дамытуға бағытталған.
Заң жобасы қабылданған жағдайда онлайн-платформалардағы құқықтық жауапкершілік тетіктері нақтыланып, әкімшілік құқық бұзушылықтардың жаңа санаттары белгіленуі мүмкін.
#Қазақстан #Айыппұл #ОнлайнПлатформа #ӘкімшілікКодекс #Заңнама #ӘлеуметтікЖелі #Коучинг #Медиация #Құқық #MunarmediaKZ