"Біздің жүйе соңғы 30 жылда қалыптасты. Билікке жемқорлық әбден сіңіп кеткен, ешкім халықтың қаржысын жеке пайдасына жаратуға ұялмайды. Өз мақсатына жету үшін жақын достарын да баспалдақ ретінде пайдалануға дайын", – дейді oinet.kz сайтына берген сұхбатында жас қазақ ақыны әрі жазушысы, бүгінде Америкада тұрып жатқан Бейбіт Сарыбай.
"Осының бәрі соңғы үш онжылдықта тамыр жайды. Ал бұдан толық арылып, әділетті қоғам құру үшін бізге тағы 15-20 жыл, тіпті 30 жыл қажет болуы мүмкін.
Бірақ мен үмітімді үзбеймін. Қазақстан ақырында дамыған әрі үлгілі мемлекетке айналады. Бұл елді жаңа буын тұрғызады. Алайда ақылсыз, ескі көзқарастағы адамдар жастарға өздерінің жаман әдеттерін сіңіріп, оларды өздеріне ұқсас етіп тәрбиелегісі келеді. Бұл – өкінішті жағдай.
Бір кездері билікке ие болып, өз рахаты үшін өмір сүрген, ұрпағына жетерлік байлық жинаған адам баласына: "Балам, заман солай болды. Мен сол жүйенің ықпалына түсіп, дәулет жинадым. Енді сен халыққа қызмет ет", – деп айта алар еді. Бірақ олай емес – олардың балалары да өздері секілді өседі. Олар жоғары лауазымдарды бірінші болып иеленеді. Осындай факторлар біздің дамуымызды тежейді, кейде тіпті кері тартады.
Дегенмен бізде талантты, білімді, қабілетті азаматтар бар. Олар мүлде елеусіз қалды деп айтуға болмайды. Сол себепті менің жүрегімде күдіктен гөрі үміт басым", – деп түйіндеді Сарыбай.