Munarmedia.kz 21.01.2026 /Астана/-Қазақстанда құрылуы жоспарланып отырған Халық кеңесінің мәртебесі мен өкілеттігі айтарлықтай кеңеймек. Жаңа орган елдің саяси жүйесінде тек кеңесші құрылым ретінде емес, нақты ықпалы бар институт ретінде қалыптасуы мүмкін.
Ең басты жаңалықтардың бірі — Халық кеңесіне заңнамалық бастама құқығын беру көзделіп отыр. Бұл оның институционалдық салмағын күшейтіп, мемлекеттік шешімдер қабылдау үдерісіне тікелей қатысуына жол ашады.
Халық кеңесінің жоғары органы ретінде сессия белгіленеді. Ол жылына кемінде бір рет шақырылып отыруы тиіс. Осы сессиялар барысында ел үшін маңызды саяси, қоғамдық және идеологиялық мәселелер талқыланбақ.
Сонымен қатар, Халық кеңесіне Қазақстан халқы Ассамблеясының этносаралық және конфессияаралық келісімге қатысты негізгі функционалы беріледі. Бұл — ұлтаралық татулық пен дінаралық келісімді сақтау бағытындағы жұмыстардың жаңа форматта жалғасатынын білдіреді.
Жаңа органның қызмет аясы мұнымен шектелмейді. Халық кеңесі:
ішкі саясатты жетілдіруге қатысты ұсыныстар әзірлеумен,
мемлекеттік идеология мәселелерін ілгерілету және түсіндірумен,
Конституцияның және мемлекеттің өзге де іргелі құжаттарының мазмұнын қоғамға кеңінен жеткізумен айналысады.
Бұған қоса, Әлемдік және дәстүрлі діндер лидерлерінің съездерін, сондай-ақ мемлекеттік маңызы бар өзге де гуманитарлық форумдарды өткізу функциясы Халық кеңесінің құзыретіне өтеді.
Халық кеңесінің мәртебесі мен оны қалыптастыру тәртібі Конституцияның жеке бөлімімен және арнайы Конституциялық заңмен реттелмек. Бұл оның құқықтық негізін нығайтып, тұрақты әрі дербес мемлекеттік институт ретінде орнығуына мүмкіндік береді.
Осылайша, Халық кеңесі Қазақстандағы қоғамдық келісім, ішкі саясат және идеологиялық тұтастықты қамтамасыз ететін маңызды алаңға айналуы ықтимал.