Қостанайға көшіп келген қазақ: "Ресейдің провинциясы секілді, Қазақстанда жүргеніңді сезінбейсің..."

Екі жыл бұрын Қостанайға қоныс аударған белгілі педагог Сәрсенбек Бақытұлының айтуынша өңір әлі күнге дейін қазақыланбаған қалпында қалып отыр.

Өңірде қазақ мүддесі үшін жұмыс істеп жатқан азаматтардың саны санаулы. Осы жолда жүрген белсенділер көптеген кедергімен бетпе-бет келуде деп жазады Ertenmedia.kz.

"Қостанайға келгелі түсінгенім, бұл қаланың аты қазақ болғанымен, заты орыс. Солтүстіктегі көршінің провинциясы ма дерсің. Өңірдегі 70 пайыздан астам бала орыс тілінде оқиды. Қазақ мектептерінің жайы мәз емес", - дейді Сәрсенбек Бақытұлы.

Айтуынша, қазақ мектебіне барған балалардың көпшілігі ана тілінен мақұрым.

"Таза қазақ мектебінде оқитын балам "Ешкіммен сөйлесе алмадым. Дос таппадым. Әке, кетейікші" деп күнде мазамды алады. Тіпті бір жолы "Өзіміздің Қазақстанға қайтайықшы" деп өтінді. "Бұл Қазақстан ғой" десем, сенбейді. Қостанай әбден орыстанған. Тұтас қаланың келбеті осындай. Өз еліңде жүрсең де, өгейсің. Ұлттық бағыт дегенді мүлде ұмытқан", - деп қынжылады автор.

Педагогтың пайымдауынша, орыстанған Қостанайдың қазақы өңірден келген баланың санасына осыншалықты әсер етуі, жағдайдың қаншалықты күрделі екенін көрсетеді.

"Туғалы орыстанған ортада өскен осындағы қазақтың қыз-жігіттері Ресей үшін соғысқа аттанып жатса, таңғалуға болмайды. Олар Кремль пропагандасының құрбандары. Билік солтүстікке мүлдем бас қатырмайды. Тоқаевтан бастап, әкім-қараларға дейін жалтақ позиция ұстанады", - дейді Сәрсенбек Бақытұлы.

Бұған дейін Әшкере өңір әкімі Құмар Ақсақаловтың Тоқаевтың ескертуіне құлақ аспай отырғанын жазған еді.