Динара Құлыбаева ҚБТУ-дың мемлекет меншігіне қайтарылуына ашық түрде қарсы шықты. Бұған дейін университеттің 100 пайыз акциясы мемлекетке өткен болатын.
Депозитарий дерегінде "Қазақстан-Британ техникалық университеті" осыған дейін "Назарбаев білім қорына" тиесілі болғаны көрсетілген.
Қордың негізін қалаушы және құрылтайшысы – экс-президенттің екінші қызы Динара Құлыбаева.
"Біз келген сәтте оқу орнының жағдайы мәз емес-тін. Ғимаратқа ұзақ уақыт бойы жөндеу жүргізілмей, техникалық ахуалы сын көтермейтін күйге жеткен. Лифтілер істемей, шатырынан су кетіп, есік-терезелері ескіріп, іріп-шіріп тұрған еді. ҚБТУ-ға соңғы жеті жылда 18 млрд теңге инвестиция құйдық", - дейді қор өкілдері.
Құлыбаева "университетке салынған инвестиция ешқашан коммерциялық мақсатты көздемеді, біз бұған дейін де, қазір де дивиденд алмадық" деп, сотта өз позицияларының дұрыстығын дәлелдемек.