Munarmedia.kz.06.07.2026. ASTANA – Солтүстік Қазақстан облысының Айыртау ауданындағы Саумалкөл теміржол вокзалында жуырда аяқталған күрделі жөндеу жұмыстарының сапасына қатысты мәселе туындады. Ресми таныстырылымнан кейін жолаушылар платформасына жаңадан төселген асфальт ақау анықталуына байланысты қайта алынды.
Жаңғыртылған вокзалдың ашылуы шамамен он күн бұрын облыс басшылығының қатысуымен өткен болатын. Іс-шараға ҚР Көлік вице-министрі де қатысып, нысанның пайдалануға берілуіне оң баға берілген.
Алайда вокзал пайдалануға тапсырылғаннан кейін жүргізілген бақылау тексерісі барысында жолаушылар платформасындағы асфальт жабынынан елеулі ақаулар анықталған.
Осыған байланысты мердігер – «KAZSTROY-SK» ЖШС-не анықталған кемшіліктерді жою туралы міндеттеме жүктеліп, жаңадан төселген асфальт толықтай бұзылып, қайта төселетін болды.
Солтүстік Қазақстан облысы әкімінің орынбасары Нұрлан Кеңесов әлеуметтік желідегі парақшасында бұл мәселеге қатысты пікір білдірді.
– Ақау анықталды. Мердігерге қайта төсеуді міндеттедік. Ең бастысы – сапа, – деп жазды ол.
Аудан әкімдігінің мәліметінше, асфальтты қайта төсеу жұмыстары мердігер компанияның өз қаражаты есебінен жүргізіледі. Бұл мақсатқа жергілікті бюджеттен қосымша қаржы бөлінбейді.
Айта кетейік, Саумалкөл теміржол вокзалы 1966 жылы салынған. Алпыс жылға жуық уақыт пайдаланылған ғимаратқа биыл кешенді жаңғырту жүргізілді. Жоба аясында ғимараттың шатыры жаңартылып, терезелері мен инженерлік желілері ауыстырылды, су құбыры мен кәріз жүйесі тартылды. Сонымен қатар бейнебақылау және өрт дабылы жүйелері орнатылып, вокзал маңы абаттандырылып, кеспетас төселді.
Алайда пайдалануға берілгеннен кейін анықталған құрылыс ақауы жүргізілген жұмыстардың сапасына қатысты қоғамдық талқылауға себеп болды.
#MunarMedia #ASTANA #СҚО #Саумалкөл #ТеміржолВокзалы #Құрылыс #Жөндеу #Асфальт #Айыртау #Қазақстан