Munarmedia.kz 11.07.2025жыл/Астана/-Шымкент қаласы әкімінің орынбасары Руслан Берденовке қастандық жасау ісі бойынша сот процесінде айыпталушы Ернар Жиембай жаңа нұсқа ұсынды. Бұған дейін ол шабуылды қызметтік жанжалмен түсіндірсе, енді әрекетінің себебін қызғанышпен байланыстырып отыр, деп хабарлайды Elmedia.
Соттағы сөзіне қарағанда, Жиембай әйелі телефонынан Берденов жіберген “Сен сұлусың” деген хабарлама мен “лайкты” көріп, эмоцияға берілгенін мәлімдеді. Айыпталушы бұған дейін де шенеуніктің өз таныстары арасындағы әйелдерге қызығушылық танытатыны жөнінде сыбыс естігенін айтып, бұл жағдай оны агрессияға итермелегенін жеткізді.
Алайда бұған дейін прокурор оқыған айыптау нұсқасында басқа себеп келтірілген. Тергеу дерегінше, Жиембай құрылыс мониторингі бөлімінің басшысынан Берденовтың нұсқауымен “Тұрғын үй Шымкент” ЖШС директоры қызметінен кетуі тиіс деген ақпарат алған. Осыдан кейін ол алкоголь сатып алып, көлігінде ішкен, аңшы мылтығын алып, сол күні кешке әкімдік ғимараты жанында Берденовты күтіп тұрған. Шенеунік сыртқа шыққанда, Жиембай оған бес рет оқ атқан, кейін “бақылау” оғын шығармақ болғанда, Берденовтың жүргізушісі көлігімен соғып, шабуылды тоқтатқан. Жараланғанына қарамастан, Берденов қарсылық көрсеткен.
Ернар Жиембай ҚР ҚК 24-бабының 3-бөлігі (“Қылмысқа дайындалу және қастандық жасау”) және 99-бабының 1-бөлігі (“Адам өлтіру”) бойынша айыпталуда. Енді ол кісі өлтіру ниеті болмағанын, тек “қорқытқысы келгенін” алға тартып отыр.
Журналист Ботагөз Омарова бұл істе аса ірі көлемде қаржы жымқыру эпизоды пайда болуы мүмкін деп болжайды. Оның пікірінше, Жиембайдың нұсқасын өзгертуі – қылмысты тұрмыстық деңгейге ауыстыру әрекеті.
“Ернар Жиембай прокурорлар әулетінде дүниеге келіп, кейін “Тұрғын үй Шымкент” ЖШС-нің басшысы атанды. Компания миллиардтаған қаржыны тендерсіз игерген. 2024–2026 жылдарға арналған көпқабатты үйлердің күрделі жөндеу бағдарламасы бойынша 3,4 млрд теңге бөлінген. Бұл қаражат Жиембайдың компаниясына тікелей, байқаусыз берілген. Қастандық жасалардан он күн бұрын әкімдік жиналысында Жиембайдан есеп талап етілді. Ол есеп бере алмады. 22 үйдің тек 10-ында ғана жөндеу аяқталғаны анықталды. Әңгіме 3 млрд теңгеден астам қаржы жайлы болып отыр. Берденовтың сұрақтары прокурордың ұлына ұнамады. Қақтығыс туындады. Жиембайды залдан шығарып жіберді. Сұрақ қарапайым еді: қаржы қайда? Жауап болмады... Сірә, ол өзіне қолайсыз сұрақ қойған адамды жоюды көздеген. 21 сәуірде Руслан Берденовке қастандық жасалды”, – деп жазады Омарова.
Берденов қызғаныш жайлы мәлімдемені “манипуляция” деп атады. “Менің ұстанымым өзгерген жоқ. Даудың түбі – қызметтік. Айыпталушы келісімшарт бойынша өз міндетін адал орындаудан жалтарды, жауапкершіліктен қашты. Мен тек ашықтық пен міндеттемелердің орындалуын талап еттім”, – деп жазды әкім орынбасары әлеуметтік желіде.
Сот процесі ашық өтуде. Руслан Берденов сот отырыстарына қатыспайды. Оның өкілі Жеңіс Тыныбек зардап шегушінің ем қабылдап жатқанын хабарлады.