Munarmedia.kz 24.11.2025 / Астана / Халықаралық бокс федерациясының (World Boxing) конгресінде Геннадий Головкин ұйым президенті болып бірауыздан сайланды. Бұл — қазақстандық спортшының алғаш рет халықаралық спорт ұйымын басқаруы жөнінен тарихи оқиға.
Өзінің алғашқы үндеуінде Головкин бокстың дамуына күш салатынын және World Boxing ұйымының Халықаралық олимпиада комитеті тарапынан толық танылуына жұмыс істейтінін айтты.
«Әрбір боксшы адал әрі қауіпсіз спортта өсіп, дамуы үшін еңбек етемін. World Boxing бір отбасы ретінде алға жылжиды. Бұл — сенім артуға болатын федерация екенін іспен дәлелдейміз. Біз тәуелсіз боламыз, бірақ олимпиадалық құндылықтарды құрметтеп, әділдік, теңдік және спортшыларды қорғау жолында жұмыс істейміз», — деді ол.
Головкинді жаңа қызметімен Мемлекет басшысы Қасым-Жомарт Тоқаев та құттықтады. Президент оның сайлануы қазақстандық боксшының халықаралық аренадағы жоғары абыройын және спорттағы зор жетістіктерін айқын көрсететінін атап өтті.