"Таза Қазақстан: “Ұлы Даланың Жасыл Елшісі” велоэкспедициясы "Байтақ" жасылдар партиясының және оның төрағасы Азаматхан Әміртаевтың басшылығымен Алматыдан бастау алған. Астана қаласында партия төрағасы Азаматхан Әміртаев пен партияның ресми өкілдері, БАҚ күтіп алып, өр рухты Сапар Аманжолына зор ықылас, құрмет көрсетіп, көроікті Көкшетауға шығарып салған еді. Велоэкспедицияны басқарған "Байтақ" жасылдар партиясының және Алматы қалалық партия филиалының саяси бюро мүшесі, веломарафоншы Сапар Аманжолұлы.
Екі мың шақырымнан артық жерді артқа тастап еліміздің экологиялық мәселелерін жинақтап, болашақта мемлекеттік деңгейде көтеруді мақсат еткен партияның веломарафоншысы Сапар бауырымызды Көкшетауда "Байтақ" жасылдар партиясының Ақмола облыстық филиалының төрағасы Баяжума Асылбек, Ақмола облыстық билер кеңесінің төрағасы Дахан Шөгшірұлы бастаған ақсақалдар алқасы, Берік Әбдіманапов басқаратын облыстық телеарна журналистері мен республикалық "Айқын", "Заң" газеттерінің тілшісі Абзал Тоқанов күтіп алды.
Сапар Аманжолұлы журналистерге сұқбат бере отырып, Ақмола өңіріндегі өзі куә болған экологиялық проблемаларымен де бөлісті.
Көкшетаудың көптен бері бас ауруына айналған Қопа көлінің де экологиялық ахуалымен танысты.
Өңірімізге ат басын бұрған арнайы қонаққа қазақ салтымен сый-сияпат жасалып ақсақалдар батасын берді.
Ертеңгі беталысы Қызылжар өңірі.
Одан әрі батыс өңірлер мен оңтүстікті беталып, ару қала Алматыға дейін 16 мың шақырымды жүріп өтуді мақсат еткен Сапар Аманжолұлының тарихи ерлігіне, азаматтық принципі мен қайсарлығына тәнті болып, сәтті сапар тіледік.
"Байтақтың" жасыл туын желбіреткен рухты қазаққа ақ жол дейміз!