Munarmedia.kz.08.08.2025 ж. /Астана/-Грузия астанасы Тбилисиде Қазақстан азаматы Чингиз Мусадиловтың мүрдесі табылды. Ол – кәсіби боксшы Серік Мусадиловтың туған бауыры екені белгілі. Бұл туралы жергілікті ақпарат құралдары хабарлады.
Алынған деректерге сәйкес, Чингиз Мусадиловты соңғы рет 4 тамызға қараған түні қала орталығындағы түнгі ойын-сауық орындарының бірінде көрген. Осы сәттен кейін онымен байланыс үзілген. Жақындары алаңдап, полицияға жүгінген. 6 тамызда БАҚ оның қаза тапқаны жөнінде ақпарат таратты. Бұл мәліметті Грузиядағы Қазақстан елшілігі растады.
Алдын ала нұсқа бойынша, Мусадилов Тбилисидің орталығындағы Джавахишвили көшесінде биіктіктен құлап қаза болған. Қазіргі уақытта Грузия Қылмыстық кодексінің 115-бабы («Өз-өзіне қол жұмсауға жеткізу») бойынша тергеу амалдары жүргізілуде.
Марқұмның ағасы Серік Мусадилов – Қазақстандағы ең үздік әрі болашағынан үміт күттіретін кәсіпқой ауыр салмақты боксшылардың бірі. «Панда» лақап атымен танымал спортшы кәсіби рингте оннан астам жекпе-жек өткізіп, олардың басым бөлігін нокаутпен аяқтаған.