Munarmedia.kz 11.07.2025жыл /Астана/-Украин тараптың бастамасымен Қазақстан Президенті Қасым-Жомарт Тоқаев пен Украина Президенті Владимир Зеленский телефон арқылы әңгімелесті, деп хабарлайды Exclusive.kz Ақордаға сілтеме жасап.
Қасым-Жомарт Тоқаев қазақ халқының украин халқына, оның тарихына, мәдениетіне және тіліне деген шынайы құрметін атап өтті. Мемлекет басшысы Қазақстанның Украинада халықаралық құқық қағидаттарына негізделген берік бейбітшіліктің орнауына мүдделі екенін растады.
Президент еске салғандай, Астана әуелден-ақ әділ негіздегі бейбітшілік формуласына бірлесіп қол жеткізуді жақтайды. Қазақстан үнемі БҰҰ Жарғысының сақталуын, мемлекеттердің шекараларының мызғымастығын және олардың аумақтық тұтастығын қорғауды қолдап келеді.
Қасым-Жомарт Тоқаевтың пікірінше, қазіргі аса күрделі жағдайда қақтығысты шешуде салмақты және рационалды қадамдар жасау қажет. Ең бастысы – украин мемлекеттілігін сақтау мен қорғауды қамтамасыз ету. «Нашар бейбітшілік – жақсы араздықтан артық» деген көне даналықты еске салып, ол барлық тарапты осы қағидатпен әрекет етуге шақырды.
Мемлекет басшысы аумақтық мәселенің халықаралық қатынастардағы ең күрделі түйіндердің бірі екенін, бейбіт келісімге, тіпті уақытша бітімге қол жеткізуде ол көбіне еңсерілмес кедергіге айналатынын атап өтті. Дегенмен, қазіргі басты басымдық – Украина мемлекеттілігін мызғымас халықаралық қауіпсіздік кепілдіктері негізінде сақтау.
Әңгіме барысында Қазақстанның Украинамен өзара қызығушылық тудыратын түрлі салада белсенді ынтымақтастықты жалғастыру ниеті де расталды.