Munarmedia.kz 11.07.2025жыл /Астана-Жамбыл облысының әкімі Ербол Қарашөкеевтің тапсырмасымен Талас ауданында екі кәмелетке толмаған жасөспірімді жүйелі түрде соққыға жығып, құлдықта ұстау дерегіне байланысты арнайы жұмыс тобы құрылды.
Облыс әкімдігінің хабарлауынша, аталған топқа облыс әкімінің орынбасары жетекшілік етеді. Оның міндетіне оқиғаның барлық мән-жайын жан-жақты зерттеу, сондай-ақ балалардың қауіпсіздігін қамтамасыз ету және олардың құқықтарын қорғау жөнінде шаралар қабылдау кіреді.
Қазіргі уақытта құзырлы органдармен бірлесіп, жасөспірімдердің өмірі мен денсаулығына төнетін қатерді жоюға бағытталған нақты қадамдар жасалып жатыр.
Әкімдік жұмыс тобының қорытындысы бойынша қосымша ақпарат берілетінін мәлімдеді. Сонымен қатар, болашақта мұндай жағдайлардың қайталануын болдырмау мақсатында өңірдегі барлық білім беру ұйымдарына кешенді тексеру жүргізу жоспарланып отыр.
Еске сала кетейік, бұған дейін Жамбыл облысында балаларды құлдықта ұстау деректері туралы жарияланымдардан кейін полиция қылмыстық іс қозғаған болатын. Ішкі істер министрі Ержан Сәденов істі өзінің жеке бақылауына алды.