Жамбыл облысында көкпар жанжалмен аяқталып, іс сотқа жетті

Ойынның екі қатысушысы бейәдеп сөздер қолданғаны үшін жазаланды. Жуалы ауданында өткен дәстүрлі ат үстіндегі ойын алаңда емес, сотта аяқталды.

Ертай ауылында өткен жарыс барысында екі ойыншы бір-біріне бейәдеп сөздер айтқан. Бұл жағдай жергілікті тұрғындардың көз алдында орын алған.

«Сот қаулысымен олар Қазақстан Республикасының ӘҚБтК 434-бабының 1-бөлігі („Спорттық және спорттық-мәдени іс-шараларда тәртіп ережелерін бұзу“) бойынша кінәлі деп танылды. Оларға әрқайсысына 78 мың теңгеден астам айыппұл салынды. Сот қаулысы заңды күшіне енді», — деп хабарлады сот өкілдері.

Өткен жылдың қыркүйегінде Астанада өткен бесінші Дүниежүзілік көшпенділер ойындарында даулы оқиға орын алған еді: қазақстандық спортшы қырғызстандық қарсыласын ұрып, бұл жаппай төбелеске ұласқан.