Munarmedia.kz.04.10.2026.ASTANA- Ресей әскерінің Киев пен Украинаның энергетикалық нысандарына жасаған жаппай соққылары жаңа қыс қарсаңында Мәскеудің қысымды күшейту стратегиясының бір бөлігі болуы мүмкін. Вашингтонда орналасқан Соғыс зерттеулері институты (ISW) осындай баға берді.
Украина президенті Владимир Зеленскийдің мәлімдеуінше, сейсенбі және сәрсенбі күндері жасалған шабуылдар кезінде Ресей тарапы шамамен 190 дрон мен баллистикалық зымыран қолданған. Негізгі нысана энергетика және инфрақұрылым нысандары болған.
Украинаның мемлекеттік энергетикалық компаниясы зақымданған электр станцияларының суреттерін жариялап, Ресей әскерін ел тұрғындарын электр қуаты мен жылусыз қалдыруға тырысты деп айыптады.
Ал америкалық Institute for the Study of War сарапшылары шабуылдардың қыс мезгілі қарсаңында жасалып отырғанына назар аударды. Олардың пікірінше, энергетикалық нысандарға соққы беру Украинадағы энергетикалық қауіпсіздікті әлсіретіп, Киевке қыс кезінде саяси және әлеуметтік қысым түсіруге бағытталуы ықтимал.
Алайда Украина да қорғаныс мүмкіндігін арттыруға күш салып жатыр. Киев пен Берлин жоғары технологиялық ұшқышсыз ұшу аппараттарын бірлесіп өндіру туралы келісімге келген.
Екі ел үкіметтерінің қолдауымен биыл бірлескен кәсіпорын құрылған. Кәсіпорын қыркүйек айында Германияның оңтүстігіндегі зауытта жаңа дрондардың өндірісін бастады.
Жаңа аппараттардың бірнеше түрі әзірленіп жатыр. Олардың бірі ұзақ қашықтықтағы нысандарға соққы беруге, ал екіншісі көлік құралдарын зақымдауға арналған.
Сарапшылар Украинадағы энергетикалық инфрақұрылымның жағдайы алдағы қыс айларында соғыс барысына ғана емес, елдегі миллиондаған тұрғындардың күнделікті өміріне де тікелей әсер етуі мүмкін екенін атап өтуде.
#Украина #Ресей #УкраинадағыСоғыс #Киев #Энергетика #Дрон #Германия #АҚШ #ISW #Munarmedia