Munarmedia.kz. 12.10.2026. ASTANA-Астанада Telegram арқылы танысқан ер адамдарды алдап кездесуге шақырып, кейін оларды ұрлап, бопсалаған үш ер адам 7 жылдан 8 жылға дейін бас бостандығынан айырылды. Бұл туралы Астана қаласының прокуратурасы хабарлады.
Тергеу материалдарына сәйкес, сотталғандар Telegram мессенджерінде қыздардың атынан жалған аккаунттар ашып, ер адамдарды кездесуге шақырған. Кейін олар жәбірленушілерді қаладан тыс жерге күштеп алып кетіп, ұрып-соққан. Сондай-ақ масқаралайтын бейнежазбаларды жариялаймыз деп қорқытып, ақша талап еткен.
Қаскөйлер үш жәбірленушіден жалпы сомасы 2,2 миллион теңге алған. Олардың бірін микроқаржы ұйымынан несие рәсімдеуге мәжбүрлесе, екіншісінің автокөлігін иемденіп кеткен.
Сот процесінде мемлекеттік айыптаушы сотталушылардың кінәсін толық дәлелдеді.
Сот үкімімен үш ер адам адам ұрлау және бопсалау қылмыстары үшін 7 жылдан 8 жылға дейінгі мерзімге бас бостандығынан айырылды. Жәбірленушілердің келтірілген материалдық залалды өтеу туралы талап-арыздары да қанағаттандырылды.
Сот үкімі заңды күшіне енді.
Астана қаласының прокуратурасы азаматтарды әлеуметтік желілер мен мессенджерлер арқылы танысқанда сақ болуға шақырады. Ведомствоның ескертуінше, адам ұрлау және ауырлататын мән-жайларда жасалған бопсалау үшін мүлікті тәркілеумен бірге 12 жылға дейін бас бостандығынан айыру жазасы қарастырылған.
#Munarmedia #Астана #Прокуратура #Қылмыс #АдамҰрлау #Бопсалау #Қауіпсіздік #Telegram