MunarMedia.kz, 28.05.2025 жыл /Астана/-АҚШ президенті Дональд Трамп Еуропалық одақтан (ЕО) импортталатын тауарларға 2025 жылдың 1 маусымынан бастап 50 пайыз көлемінде кедендік тариф енгізуді ұсынды. Бұл туралы ол өзінің ресми мәлімдемесінде хабарлады.
Трамптың айтуынша, Еуроодақтың құрылу мақсатының бірі — АҚШ-пен сауда арқылы пайда табу болған. Президент ЕО-мен сауда қатынастарын «өте қиын» деп сипаттап, америкалық компаниялар үшін түрлі тосқауылдардың барын атап өтті.
«Еуроодақпен жұмыс істеу өте қиын болды. Олардың күшті сауда тосқауылдары, қосылған құн салығы (ҚҚС), күлкілі айыппұлдар, бейқаржылық шектеулер, валюталық манипуляциялар, әділетсіз және негізсіз талаптар – мұның бәрі АҚШ үшін жыл сайын 250 миллиард доллардан астам сауда тапшылығына алып келді. Бұл — мүлде қолайсыз көрсеткіш», — деді Трамп.
Президент АҚШ пен ЕО арасындағы келіссөздердің нәтижесіз екенін айтып, Еуроодақтан келетін барлық өнімге 50% баж салығын салуды ұсынды. Бұл тариф АҚШ аумағында өндірілген немесе құрастырылған өнімдерге қолданылмайды.
«Егер өнім АҚШ-та өндірілсе немесе жиналса, тариф салынбайды. Баршаңыздың бұл мәселеге назар аударғандарыңызға рақмет!» — деді Трамп мәлімдемесінде.
АҚШ пен ЕО арасындағы сауда қатынасы соңғы жылдары бірнеше рет шиеленісіп, тараптар бірқатар өзара тарифтер мен санкциялар енгізген болатын. Жаңа бастама Еуропада АҚШ-қа қарсы жауап шараларын туындатуы мүмкін деген қауіп бар.