Венгрия премьер-министрі Виктор Орбан бүгін Вашингтондағы НАТО саммитінен кейін АҚШ-тың экс-президенті Дональд Трамппен кездесуге оның Флорида штатындағы жеке резиденциясына бармақ
Бұл туралы дереккөздеріне сүйенген Bloomberg агенттігі хабарлады. Ақпаратқа қарағанда, кездесуде талқылайтын бас тақырыптардың бірі – Украинадағы соғыс.
Bloomberg Венгрия премьер-министрінің бұл сапары Орбанның Трамп пен Ресей президенті Владимир Путин арасында делдал рөлін алды деген күдікті күшейтуі мүмкін деп жазды.
Шілденің басында Орбан Киевке, Мәскеуге және Пекинге барып, Украина, Ресей және Қытай басшыларымен соғысты тоқтату жайын талқылаған.
Орбан сапарларын "бейбітшілік миссиясы" деп атайды.
Венгрия 1 шілдеде алты айға Еуропа одағына төрағалық етуді бастаған. ЕО да, НАТО да Орбанның сапарлары оның жеке бастамасы екенін айтқан. Олар Венгрия премьер-министрі ұйым емес, Будапештің ғана атынан барады деді.